Sa matuai fesiligia e le Afioga i le Faamasino ia Fepuleai Ameperosa Roma le toe molia atu o le alii o Apisai Joseph Pilitati i soligatulafono tau talepefale ma le gaoi, ae e le’i mae’a le 18 masina o le isi foi faasalaga falepuipui na tuuina atu e le Faamasinoga iā te ia.
Na faamanino e le Faamasino o le Faamasinoga Maualuga e faapea, o loo iai faamaumauga a leoleo, o le Aso 27 Mati 2024 na faamaonia ai soligatulafono a Apisai.
Sa faamaonia (convicted) le talepe fale, gaoi ma le fa’ao’o lima, ma faasala ai o ia i le 18 masina faafalepuipui.
Peitai, e le’i mae‘a lea faasalaga ae toe tulai mai ai nisi soligatulafono fou i le Aso 13 Me 2025. Na fesiligia ai e le Faamasino le mafuaaga na toe mafai ai ona tulai mai nei soligatulafono, ae e lei mae‘a lona faasalaga muamua.
“O le mea la lena o lea e tuufesili i le mafaufau, poo le mea na e sola mai i tua, ma e toe faia isi soligatulafono ia, pe faafefea ae poo lea foi se isi auala na faataga ai ona e te sau i tua.”
Sa tali le alii o Apisai Joseph Pilitati, “O le taimi o le 2025”.
“O le ā le taimi o le 2025?”
Ae tali Apisai e faapea, na faamalolo mai o ia i le masina o Me o le tausaga 2025 i le aso malolo o tinā, ma sa faailoa atu e leoleo o le falepuipui, ua mae‘a lona faasalaga.
“O leoleo lava na faamagaloa a’u – ua uma ou faasalaga.”
O le Aso Sā o Tinā i lena tausaga, o le Aso 11 Me 2025.
Peitai, e le’i atoa se lua aso talu ona tatala mai i tua lea alii, ae toe solitulafono foi i le Aso 13 Me 2025.
Lua aso talu ona tatala i tua ae ulufale Apisai Joseph Pilitati i le fale o se tamā 52 tausaga i Tanugamanono, i le va o le 3 ma le 4 i le vaveao.
Sa ia aveesea faagaoi ai se speaker JBL e tusa ma le $1,200 lona tau. Na lipotia e le aiga lenei mataupu i leoleo i lea lava taeao.
E 5 masina mulimuli ane, i le Aso 12 Oketopa 2025, ae toe osofaia ai foi e Apisai le nofoaga a se tamā fai pisinisi, 42 tausaga mai Vaitele-Fou.
Sa talepe e Apisai le faitotoa, ma ulufale atu i le maota o lenei tamā, ma aveese faagaoi ai se bluetooth speaker, 12 pea seevae taalo, ma isi meatotino e tusa ma le $1,645 le tau aofa‘i.
E pei ona faailoa i luma o le Faamasinoga, o le Aso 5 Novema 2025 na vaaia ai Apisai e leoleo i le maota gasegase i Motootua. Sa ia taumafai e sola ese, ae sa mafai lava ona pu‘eina e leoleo i lenā aso.
Sa toe tulai i luma o le Faamasinoga le alii o Apisai i le Aso 24 o Novema, ma ia ioeina moliaga faasaga ia te ia.
Na tā’ua e le Faamasino, e tele itu e matuiā ai lenei mataupu, e aofia ai le toe faia o soligatulafono lava nei e tasi e aafiaga ai meatotino a tagata ma pisinisi. E lē laititi foi le tau o mea na gaoia, ma e le‘i toe maua mai foi nei meatotino.
Saunoa le afioga i le Faamasino ia Fepuleai Roma i le alii o Apisai, “E le mafai ona faaauau pea ona e faia soligatulafono nei, ma e tulai mai i luma o le faamasinoga ma e talosagaina se faasalaga mama.”
Na iloiloina foi e le Faamasinoga faamaumauga a leoleo i le va o le 2021 ma le 2024 – e 17 lelei lava soligatulafono ua faamauina ai, i le gaioiga lava lea o le talepefale ma le gaoi.
Na talia e le Faamasinoga le fautuaga a loia a le Malo (Prosecutors) ina ia amata le faasalaga i le 4 tausaga. Sa faaopoopo iai le 6 masina ona o soligatulafono muamua.
Sa toesea nisi masina ona o le vave ioeina e Apisai o ona moliaga ma faaiuina ai i le 3 tausaga lona faasalaga i le toese, ma o le a amata ona faitau mai i le taimi na taofia mai ai o ia iā Novema 2025.
Vacancies
Post Views: 1,311
