Sa tula’i se tamā e aiga lelei ma le afioga ia Lautimuia Uelese Vaai, ma molimau, o ia e first cousin ma le tuaā o le Sui Faipule, ma e masani ona asiasi atu i le Ofisa o le Sui Faipule ao fai o ia ma Minisita o Tupe, ma maua mai ai ana tupe faameaalofa e ta’i $200 tala.
O le tamā matua ia Tualagi Telima Leaupepe, ua 82 tausaga o lona soifua.
Sa ia molimau e la te aiga lelei lava ma Lautimuia, lea sa tauaveina le tofiga o le Minisita o Tupe o Samoa.
O le iloiloga o le mataupu i le tagi (election petition) a Taioaliiseu Fiti Aimaasu, e faasaga ia Lautimuia, O loo iai foi se tagi (counter petition) a Lautimuia, e faasaga ia Taioaliiseu.
O taualumaga o le Faamasinoga o Faigapalota (Electoral Court) o loo iloiloina i luma o Alii Faamasino ia Fepuleai Ameperosa Roma ma Loau Donald Kerslake.
O le tamā matua ia Tualagi Telima Leaupepe, sa ia molimau e lã te aiga lelei lava ma Lautimuia, lea sa tauaveina le tofiga o le Minisita o Tupe o Samoa.
Ina ua kolosi (cross examine) le molimau e le alii loia o loo tulai mo Lautimuia, le Susuga ia Leiataualesa Komisi Koria, sa faamautu ai le fesootaiga vavalalata o Tualagi Telima ma le Sui Faipule.
Sa saunoa le molimau, e masani ona maua ana tupe mai ia Lautimuia, i luga o le vā faaleaiga, ma o nei tupe sa tuuina atu “e fai ai se mea e na te manao iai”.
“O lau molimau, e te lua aiga ma le tamā o Lautimuia?”
“O lea lava lau afioga, e first cousin mā’ua ma le tamā o Lautimuia..”
“I le tausaga 2023 sa masani lava ona e alu i le ofisa o Lautimuia?”
Tali Tualagi, “O le taimi muamua lena lea sa ou alu ai ia Lautimuia e fesili i mea o le poloketi.”
“Ae o taimi na sa agalelei atu ai Lautimuia ia te oe ma avatu tupe, e sa’o?”
Tali Tualagi, “E faalua ona ou alu i le ofisa o le Minisita ma aumai e Lautimuia le tai $200 ia te a’u e faatau ai se mea ou te manao ai.”
Sa fesili le alii loia pe sa talanoa atu Lautimuia i se mataupu tau palota i ia taimi, ae tali le tamā, e leai.
Sa toe fesili le loia poo se faatosiga (bribery) le tuuina atu o ia tupe ia te ia, ae tali Tualagi, e leai.
Sa molimau Tualagi, o lona afafine e FAST, ma sa silafia fo’i e Lautimuia o lā’ua ma lona afafine, e palota iā Taioaliiseu.
“Na ma talatalanoa ma Taioaliiseu i le telefoni na aumai e lo’u afafine, ae te’i ua tu atu le taavale a Lautimuia.”
“Ou sau loa ma talanoa ma Lautimuia, ou faapea atu iai, e aua le popole.”
“Sa ou fai sao foi ia Lautimuia, o a’u ma lo’u afafine e palota ia Taioaliiseu ona e FAST lo’u afafine. Ae o lo’u fanau uma e palota uma ia Lautimuia..”
Ae ina ua molimau le afafine o Tualagi, sa māua ai le mau eseese o le toeaina ma lona afafine.
O Amulia Selau Leaupepe, sa ia molimau na oo atu le taavale a Lautimuia ao loma le faigapalota laititi, ma sa tuuina atu e Lautimuia le 200 tala i lona tamā.
“Sa ou vaai mai ua afe atu le taavale lanu uliuli, Ford Ranger, e tint faamalama. Ou te leiloa o Lautimuia.”
“Ae ou vaai mai ua oso atu i lalo, o Lautimuia o savali mai loa. Ou fai atu, ‘O le a le mea ua e sau ai Lautimuia? O le a fai le faiga palota?’”
“‘Lea ou te sau i le toeaina,’
“Sa tele lava a’u tala iā Lautimuia.”
Na molimau Amulia, sa ia iloa atu le tupe sa tuuina atu e Lautimuia i lona tamā matua.
“Na ou tilotilo mai i tua o le tane vai, ae faapau loa e Lautimuia le tupe ae faanatinati lana savali ae oso i le taavale.”
“Piki loa e lo’u tamā le tupe i luga, ou fesili loa iai, ‘Papa, o le a lea mea na?’”
“‘O le tupe, e $200.’”
“‘Sa ou fai atu, Papa, o le bribery le mea lena.”
Ae sa fesili le Faamasino ia Loau Donald Kerslake: “O le tupe a le toeaina lea na maua mai ia Lautimuia, na maua ai sou tupe?”
Se tali Amulia, “Leai,”
Sa ia fai i lona tamā e toe faafoi le tupe a Lautimuia ona e taitonu o ia, o se tupe e faatosiga ai mo le palota.
“‘Papa, o le bribery le mea lenà. Aua nei e faaaogaina le tupe na, alu e toe ave le tupe na ia Lautimuia.’”
O loo faagasolo pea iloiloga a le Faamasinoga i le mataupu o le faigapalota laititi a Vaimauga 3, lea sa mamao ai lava palota na manumalo ai Lautimuia i le filifiliga a le itumalo.
Post Views: 3,056
