Tusia: Pesetā Tusiga Taofiga. Ua ‘ave le lagolago malosi a le au uso Tuilagi ua lauiloa i le lalolagi atoa i le Lakapi, e unā’ia ma fa’asoa atu ai le taleni i fanauiti i totonu o Samoa.
O se va’aiga mamao, o le ā unā’ia ai le si’itia o tomai ma agava’a fa’apitoa o fanauiti, i le fa’aāogaina o le taleni lakapi.
O lenei faamomoe, ina ia o gatusa ma faiga fa’avae a’o aiaiga ma tulafono fa’avāomālō o le lakapi, ua aga’i iai le lalolagi i lenei vaitau.
O se Polokalame Fa’apitoa a le afioga iā Lauaki Fred Tuilagi o lo’o faia i Peretania Tele ma Farani, o lo’o a’oa’oina ai fanauiti i nā atunu’u, i le tāua o le iloa o tomai ma agava’a fa’apitoa i le taleni o le lakapi.
O le sini autū, ina ia atinae le taleni ao laiti mai le fanau, e tuputupua’e ai, ae ua vave ona filifili i au fili a atunu’u, ae ua faigofie ona malamalama i tulafono ma le fa’atinoga o le ta’aloga i le tulaga fa’apolōfesa ua iai nei.
I le tulaga fa’aletonu ma le mauālalo ua iai le tatou Lakapi i Samoa nei, ua ‘afa e tasi ai le finagalo o lenei ‘au uso, ina ia tutūfa’atasi, e fa’avaeina se Polokalame Fa’apitoa e fitoitonu i le a’oa’oina o tomai ma agava’a fa’apitoa o fanau i le taleni lakapi iuni, lakapi pa’i ma le lakapi liki.
O Samoa sa mitamita i le lakapi, peita’i ua le o toe va’aia Samoa i le Lakapi Iuni i lenei vaitau, ona ua tulaga fa’aletonu ana taumafaiga i le tele o ta’aloga fa’avāomālō.
I le silasila a lenei ‘au uso e pei ona saunoa i ai Leaupepe Alesana Tuilagi, e afua mai i le leai o se a’oa’oga fa’apitoa e timata ai le mafaufau o ia fanau ma tapena mamao ai ina ia iloa ona fa’aāoga le taleni.
“O fanau Samoa, o le taleni lakapi, ua leva ona iai, o le malosi fo’i e fa’atino ai le lakapi, ua leva ona iai, toe pau lava le galuega e mo’omia ona fai, o le a’oa’oina ina ia iloa ona fa’aāoga tatau le taleni.
“O le ala fo’i lea, e faigatā ai ona fa’atumauina tatou ‘au fa’avāomālō i tulaga mauāluluga, ona e suia loa le ‘au, ona faigatā fo’i lea ona toe fa’atulaga atoa, tomai ma agava’a ia o gatusa ma le mo’omiaga o lo’o iai e ala i le malamalama i le fa’aāogaina o le taleni.”
Saunoa manino Leaupepe, o le naunauta’iga, ia tapena mai lava fanau a’o tamaitiiti se’ia o’o lava ina matua ma o’o i le tulaga ua tatau ai ona fa’aāoga lana taleni i ‘au fili a Samoa, ona leai lava lea o se galuega tele a le Pulega o ia ‘au e toe faia mo nei fanau.
O lenei fa’amoemoe, o le ā fa’apitoa lava mo fanauiti mai le 5 i le 9 tausaga fa’atasi ai ma fanau mai le 9 i le 14 tausaga.
E tolu aso o lo’o fa’agasolo ai lenei fa’amoemoe [Aso Lulu, Aso Tofi, Aso Faraile] mo na’o le tasi le itulā i le Malae Ta’alo a le Ā’oga Tulaga Lua a Malisi i Mulivai.
A mae’a lea tolu aso, ona fa’atulaga loa lea o le Kalena Fa’aletausaga o lenei Polokalame, e fa’asolo ai ina ia fa’asopolia Samoa atoa.
O le silasila loloto a le ‘au uso a Tuilagi, ia fa’asoa le tomai i fanauiti, ina ia iloa fa’aāoga le saoasaoa, iloa le itu o le tagata e tatau ona pu’e, ia iloa pe fa’apeī ona sapo le polo lakapi, ina ia mau lelei ai i lima, o ā itu e tatau ona a’a ai le polo lakapi..
Afai ae mausalī tomai fa’apitoa nei o fanauiti i lo latou soifuaga mu’amu’a, e 18 ane tausaga, ua na’o le fa’apipi’i lava o Tulafono o le ta’aloga ma isi galuega fa’aopoopo a Pulega o ‘au fili, ae ua le toe mo’omia se a’oa’oina o tomai i le fa’aāogaina o le taleni.
O le tatalo a le ‘au uso Tuilagi i mātua, ia lagolago i le tapu’eina o taleni a fanau, ‘aua lava ne’i ma’imauina, auā o le lumana’i lea o fanau mo ā taeao, e tausia ai ‘āiga, ma tautua ai nu’u ma ekalesia.
Tusiga Taofiga is a member of the Government of Samoa’s Press Secretariat team. He is a senior reporter with over 10 experience and writes in both English and Samoan.
Post Views: 845
