Tusia: Pesetā Tusiga Taofiga, Gvt Press. Ua iai le fa’amoemoe o le Matāgaluega o Tinā ma Tama’ita’i, Atina’e o Nu’u ma Agafeso’ota’i o le fa’ai’uga o le masina lenei o Iuni i le Aso 30, 2026, o le aso fa’ai’u lea e mafai ai ona tu’uina atu le fa’amanuiaga ta’i $150 e fesoasoani ai i le toe a’e o fanau i ā’oga.
I le Saunoaga Fa’aMinisitā a le afioga iā Moefa’auouo Julius Ah Kui Tafuna’i, na ia talatala manino ai, ua 95% o tagata Samoa, ua mae’a ona tala a latou seleni.
Ae o le aofai o le seleni sa alu ai, e silia ma le $29 miliona tala ua fa’aaluina i lea fa’amoemoe tāua.
O le naunauta’iga o le Mālō, ia gafatia e mātua ona fa’atupe nisi o tapenaga a fanau i le toe a’e ai i a’oa’oga i lenei tausaga.
O le to’atele o Faipule na sausaunoa i lea fesoasoani i totonu o le Fono Usu a Samoa, na fa’aālia lo latou agaga fa’afetai i le fa’ama’ite mea lelei o le Mālō, a’o se fesoasoani ma se fa’amāmā ‘avega i le taimi tonu ua talafeagai mo fanau i le toe a’e ai i ā’oga.
Mo so’o se tasi e le’i maua lava lana $150, na saunoa manino le afioga i le Minisitā, e tatau ona vave feso’ota’i i ō latou Ofisa o Fono Fa’avae..
Ina ia fa’atulaga ai le auala e vave fa’ao’o atu ai ā latou seleni, a’o le’i o’o atu i le Aso 30 Iuni 2026, o le Aso Lua o le vaiaso nei.
O le naunauta’iga o le Mālō, ia ‘aua ‘aua lava ne’i toe ma’imaua se avanoa tāua mo nei fanau, e lē ā’o’oga ai, ona e mafua mai, i le musuā o mātua, ona ua lē lava le fa’asoa.
O lo’o fa’agasolo fo’i le Polokalama Fa’apitoa mo le Fesoasoani i Ā’oga a le Fanau aemaise i piliā’oga (One Government Grant – OGG)
O lea fa’ama’ite ua ui atu i Fono Fa’avae i le galuega tausoa fa’atasi ma le Matāgaluega o Ā’oga ma Aganu’u (MEC) ina ia mautinoa e mautū, lelei ma atoatoa tulaga uma mo ā’oga a fanau.
Ata Pu’eina: Parliament of Samoa
Avanoa Faigaluega
Tusiga Taofiga is a member of the Government of Samoa’s Press Secretariat team. He is a senior reporter with over 10 experience and writes in both English and Samoan.
Post Views: 1,394
